Նորություններ

Հուլիսի 16-ին Հայաստանի Վարկային կազմակերպությունների ասոցիացիան մասնակցեց NOMNAR (Network of Microfinance Networks in Asia Pacific Region) միջազգային ցանցի հերթական եռամսյակային առցանց հանդիպմանը, որը կազմակերպվել էր Հնդկաստանի Sa-Dhan ասոցիացիայի կողմից։

Հանդիպման ընթացքում քննարկվեցին NOMNAR-ի առաջիկա ծրագրերը, անդամ երկրների միջև համագործակցության խորացման հնարավորությունները, Ասիական զարգացման բանկի հետ համատեղ նախաձեռնությունները, ինչպես նաև միկրոֆինանսավորման ոլորտում գիտելիքների փոխանակման և կարողությունների զարգացման ուղղությունները։ Առանձնահատուկ ուշադրություն դարձվեց կանաչ ֆինանսավորման, միկրոապահովագրության, թվայնացման, ոլորտային կարգավորման և ֆինանսական ներառման թեմաներին։

Հանդիպման շրջանակում Շրի Լանկայի Միկրոֆինանսական Ասոցիացիան ներկայացրեց երկրի նոր Microfinance and Credit Regulatory Authority Act օրենքը, որի միջոցով ներդրվել է միկրոֆինանսական կազմակերպությունների նոր կարգավորման և լիցենզավորման համակարգը։ Քննարկումը կարևոր հնարավորություն էր անդամ երկրների համար՝ ծանոթանալու ոլորտի կարգավորման միջազգային փորձին և փոխանակելու լավագույն մոտեցումները։

Հայաստանի մասնակցությունը NOMNAR-ին հնարավորություն է ստեղծում ACORA-ի և նրա անդամ կազմակերպությունների համար ընդլայնելու միջազգային համագործակցությունը, ուսումնասիրելու տարածաշրջանային լավագույն փորձը և ներկայացնելու Հայաստանի միկրոֆինանսավորման ոլորտի ձեռքբերումները միջազգային գործընկերներին։